Phili 3 | NdeIBE | STEP | Okokucina, bazalwane, thokozani eNkosini! Akusihlupho kimi ukulilobela ngezinto zinye futhi, njalo kuyisivikelo kini.

Philippians 3

Akukho Themba Emzimbeni

1 Okokucina, bazalwane, thokozani eNkosini! Akusihlupho kimi ukulilobela ngezinto zinye futhi, njalo kuyisivikelo kini.

2 Qaphelani izinja lezo, abantu labo abenza okubi, abalimazi bomzimba labo. 3 Ngoba thina yithi abokusokwa, thina esikhonza ngoMoya kaNkulunkulu, esiziqhenya ngoKhristu uJesu, njalo esingabeki ithemba okwenyama –

4 lanxa nje mina ngokwami ngilezizatho zethemba elinjalo. Uma kulomuntu ocabanga ukuthi ulezizatho zokuthemba okwemnyama, mina ngilezinengi:

5 ngasokwa ngosuku lwesificamibili, ngingowako-Israyeli, owesizwana sakoBhenjamini, umHebheru wamaHebheru; ngokomthetho, ngingumFarisi;

6 ngokutshiseka, ngahlukuluza ibandla; ngokulunga mayelana lomthetho, angilacala.

7 Kodwa loba kuyini okwakuyinzuzo kimi khathesi ngikubala njengokulahlekelwa ngenxa kaKhristu. 8 Phezu kwalokho, konke ngikubona kuyize lapho kulinganiswa lobukhulu obumangalisayo bokwazi uKhristu Jesu iNkosi yami, esengilahlekelwe yizinto zonke ngenxa yakhe. Ngizibala njengemfucuza, ukuba ngizuze uKhristu 9 ngitholakale kuye, ngingelakulunga okungokwami okuvelela emthethweni, kodwa lokho okungenxa yokukholwa kuKhristu – ukulunga okuvela kuNkulunkulu njalo okungokukholwa. 10 Ngifuna ukumazi uKhristu lamandla okuvuka kwakhe ekufeni lobudlelwano bokuhlanganyela ekuhluphekeni kwakhe, ngibe njengaye ekufeni, 11 ukuze, ngenye indlela, ngithole ukuvuka kwabafileyo.

Ukulwisela Ukuya Ekucineni

12 Akusikuthi sengikuzuzile konke lokhu, loba ukuthi sengiphelelisiwe, kodwa ngilwisa ukuba ngibambe lokho uKhristu Jesu angibambela khona. 13 Bazalwane, angikazibali njengosekubambile lokho. Kodwa yinye into engiyenzayo: Ngiyakukhohlwa okusemuva ngizama ngamandla ukufinyelela kokuphambili,

14 ngilwisela ukufinyelela ekucineni ukuba ngithole umvuzo uNkulunkulu angibizela wona ezulwini ngoKhristu uJesu.

15 Sonke thina esesiphelele kumele sikhangele izinto ngengqondo enjalo. Uma kokunye licabanga ngokwahlukileyo, lalokho uNkulunkulu uzakwenza kucace kini. 16 Kuphela nje kasiqhubekeni ngalokho esesikuzuzile.

17 Bazalwane, hlanganyelani labanye ekulandeleni isibonelo sami, libananzelele labo abaphila ngokwesibonelo esalitshengisa sona.

18 Ngoba, njengoba ngangihlala ngilitshela kuqala lakhathesi ngiyatsho futhi langezinyembezi, ukuthi abanengi baphila njengezitha zesiphambano sikaKhristu.

19 Isiphetho sabo yikubhubha, unkulunkulu wabo yisisu sabo, lodumo lwabo lusehlazweni labo. Ingqondo yabo isezintweni zasemhlabeni.

20 Kodwa elethu ikithi lisezulwini. Njalo simlindele ngokutshiseka uMsindisi evela khonale, iNkosi uJesu Khristu, 21 yena okuzakuthi ngamandla amenza abeke izinto zonke ngaphansi kwakhe, uzaguqula imizimba yethu elesimo esiphansi ibe njengomzimba wakhe olenkazimulo.